我老曹入社會做事，便希望賺大量金錢，同時嚮報紙寫文章教人搵錢。今天回望，自己已由青年期漸漸步入老年期，三十年過去，親眼睇到唔少人成功，亦見過唔少人無論幾努力仍然未能成功。觀察所得，成功者並唔特別聰明，亦唔見得特別勤力；未能成功者並唔愚蠢，亦唔係特別懶惰。兩類人最大分別係：
第一，成功者通常抱持積極態度，唔少年輕人未嘗試做一件事，已認為自己唔得。記得我老曹好年輕時便做投資公司經理，當年唔少世叔世伯都認為我老曹咁年青就做經理，得唔得呀？別人講得多，自己信心亦動搖，後來自己諗通ｏ左－老細信任自己係自己ｏ既運氣，只要努力做到最好，便無愧別人信任，成功固然好，失敗亦於心無愧。
第二，嚮經濟交叉點作出正確決定，最重要係分析前景而非回顧往日光輝；每當狂潮出現係人都知，例如1997年8月前樓市狂潮，2000年3月科網股狂潮及今年1月國企狂潮，點解咁多人走唔切？皆因貪眼前風光，忘記即將面臨的風險，希望賺盡才走，結果無路可走！
第三，你所想，你所做，你所交的朋友，決定你變成怎樣的人。大部份人想得太多，做得太多，95%希望發達，但從來唔考慮改變自己ｏ既想法，做法及所認識的朋友，人生又怎會出現改變？許多事唔係突然發生，而是你令它發生！唔好相信命運，要自己掌握未來；訂下人生目標，然後一步步將佢變成真；平衡工作與家庭，事業成功但家庭失敗的人唔快樂；貧賤夫妻百事哀，冇一定收入基礎的家庭亦快樂極有限；財富唔係ｏ係銀行保險箱內，而係ｏ係你的腦袋內，善用腦袋可得財富；學習富想像力的分析，不作墨守成規的蠢才！開源節流乃兩大致富方法，經濟繁榮期宜努力開源，經濟衰退期宜努力節流。不過，千萬不可為了節流而唔開源。
摘錄自 - 信報
沒有留言:
不接受新留言。