20131218 馬年開年開工日

團年之後，便要迎接新年，甲午年初一在2014年一月三十一日，還未到立春，真正甲午年要在二月四日立春之日才開始。年初一是壬寅除日，吉時甚長，由子時開始至午時皆吉（即2014年1月30日晚上十一時至2014年1月31日下午一時），啱晒出門拜年辦事，晚上回家吃飯，七至九時（戌時）為吉，亦啱數。

開年咯喎，通常在年初二，特別係古老舖頭，今日廿一世紀之店舖，一年三百六十五日都開門營業，因為租金太貴也，就唔顧得咁多吉日凶日咯，總之全年無休，年初二自不例外。傅會長話在甲午年初二開年，幾麻麻，如係店舖開年，勉強用卯時（早上五至七時），旺老闆；用巳時（九點到十一點）主有貴人幫忙；用戌時（晚上七至九）主一眾夥計合作，睇老細心水如何。

打工仔不在零售店工作的話，一般在法定假期後開工，甲午年假期有四天，星期五至星期一，2014年2月4日星期二立春日年初五，政府機構、各大銀行、商舖開工，欣逢好日，希望為2014甲午年帶來一個好開始。此日為丙午日定日，沖鼠人，特別係庚子年，戊子年生人（1960、1948、2008），開工吉時甚長，適合早上返工，但注意辰時（七至九時）係凶時，傅會長建議如可能，最好揀在九時半至十一時（巳時、午時）返工，巳時有利荷包脹，午時有利財源來自四方，黃昏酉時（五至七時）開工呢，利有老細照住喎。

年初六（二月五日）開工亦唔錯，沖牛人（丑年出生），年初七最差（二月六日），係破日，諸事不宜。如有私人假期，還可以拖到二月七日星期五（年初八）至開工，呢日係己酉日危日，辰巳午未時（早上七時至下午三時）皆吉，辰時開工，主有群眾支持，眾人幫手，不過此日不利兔人（卯年生人）可避則避。

講過開年開工吉日，傅會長有一忠告，甲午年太歲名「章詞」，但坊間有刊物誤寫為「張詞」，甚至「辛詞」，實誤，一啲刊物更附送太歲符，居然印錯或印漏符膽，根本係冇用之物，不要張貼。