20150126 羊年犯太歲

一月十三日本欄提及「讀者敦促」，講到已有讀者要求一如去年，搵高人批羊年流年。左丁山那敢怠慢，立即找到中大聯合書院校友游應森兄代為聯絡同佢亦師亦友嘅易學會會長傅沛基先生（下稱傅會長），憑游兄面子，傅會長特別騰出空檔，於一月二十一日星期三中午及下午出城，接受左丁山訪問。

於是乎在陸羽茶室訂好位，恭迎傅會長伉儷。點知食完午飯，去到埋單時份，游兄一聲唔該，搶去賬單付鈔，真係多謝之至。飲茶後請傅會長到寫字樓，拿出紙筆，請傅會長指示明年乙未羊年方向，本來秘書一早準備好一枝錄音筆嘅，秘書趁午飯時間去咗睇醫生未返，點知左丁山笨手笨腳，秘書不在就唔識開着枝錄音筆，唔通等秘書返到先至啟動咩，於是索性只憑筆錄強記，如有錯漏，乃左丁山之責。

傅會長先來幾句開場白，要左丁山及眾人記住，順天行事，凡事睇開啲，總要積番啲陰德，與人為善，勿抱佔人便宜之心，持守公道。口訣云：「得失榮枯總由天，機謀用盡枉徒然，無藥可延卿相壽，千金難買子孫賢，若能了解陰陽理，一日優閒一日仙。」又云：「孤陰不生，獨陽不長」，蓋陰陽相交生萬物，世界先至可以維持平穩，代代生生不息。傅會長驚左丁山聽唔明，特別講多句，「依家世界興起陽對陽，陰對陰，違反自然，長此以往，人類消亡矣。」左丁山聽完，諗咗十秒，不禁失笑，陽對陽，男溝男也，陰對陰，女女同房也，當然不能誕生下一代，若成為風尚，世界人口自然減少，難以維持平穩，即使陰陽相接，若為自己玩樂計，不願生育下一代，如21世紀之日本，人口亦會逐年減少。當然，此問題目前只在先進發達國家出現，菲律賓、印度嘅人口增長甚勁，係未來亞洲經濟動力。左丁山知道最多人想知之事，就係邊個生肖犯太歲，傅會長云，明年係乙未年，由2015年2月4日立春之日開始（當日上午十一時五十八分），唔係計2月19日年初一嘅。在2月4日中午十二時後生人，已經係羊年出世。未屬土，與辰戌丑相同，四者皆犯太歲，以生肖計即係羊、龍、狗、牛犯太歲，最嚴重者係牛（丑未相沖），兼且睇通勝天乙星官圖，牛人有歲破、大耗、欄干、月煞四凶星，頭上無吉星相扶持，幾唔妥，傅會長亦指出，雞人（酉）雖然唔犯太歲，但亦係只有凶星，無吉星，亦應該與羊、狗、牛、龍一樣掛太歲牌。


資料來源：http://hk.apple.nextmedia.com/supplement/columnist/左丁山/art/20150126/19015957